Friday, Dec 09th

Last update:11:22:38 AM GMT

Headlines:

दुदैर्वी मागणी!

Print
महाराष्ट्र टाइम्स
१९ नोव्हेंबर २०१०
ठाणे, भारत

एड्सवरील उपचारांसाठी ठाणे सिव्हिल हॉस्पिटलातील डॉक्टरांनी पैसे मागितल्याचा आरोप केला जावा, यासारखी दुदैर्वाची गोष्ट नाही. एड्सच्या या रुग्णाला ठाणे येथील सिव्हिल हॉस्पिटलामध्ये जाण्यास मुंबईतील जे. जे. हॉस्पिटलातूनच सांगण्यात आले होते. त्यानुसार सदर रुग्ण ठाण्यातील हॉस्पिटलात गेल्यावर त्याला औषधे देण्यासाठी पाच हजार रुपयांची मागणी संबंधित डॉक्टरांनी केली, असा आरोप आहे.

सरकारी हॉस्पिटलांत एड्सच्या रुग्णांना देण्यात येणारी एआरटी औषधे विनामूल्य दिली जातात, याचे स्मरण या रुग्णाने संबंधित डॉक्टरांना करून दिले; परंतु त्याचा काहीही उपयोग झाला नाही. एड्सच्या रुग्णाकडे खरोखरच असे पैसे मागितले गेले असले, तर त्याची संपूर्ण चौकशी व्हायला हवी आणि त्यामध्ये संबंधित डॉक्टर दोषी आढळले, तर त्यांच्यावर योग्य ती कारवाईसुद्धा व्हायला हवी. याचे कारण असे की एआरटी ही औषधे एड्सवरील उपचारामध्ये अतिशय महत्त्वाची असतात. त्या औषधांच्या आधारानेच एचआयव्हीचा संसर्ग झालेली व्यक्ती आपले आयुष्य जगत असते. एका अर्थाने त्याच्या आयुष्याची दोरी ही त्या रुग्णाला योग्य त्या मात्रेमध्ये आणि योग्य त्या वेळी मिळणाऱ्या एआरटी औषधांवरच अवलंबून असते. ही औैषधे सरसकट सर्वच रुग्णांना परवडणारी नाहीत.

परंतु त्यामुळे औषधोपचाराविना राहण्याची वेळ कोणावर येऊ नये, यासाठी सरकारने पुढाकार घेऊन ही औषधे सरकारी हॉस्पिटलांमधून विनामूल्य वितरित करण्याची सोय केली. त्यामुळेच एचआयव्हीचा संसर्ग झालेल्या रुग्णांना आणि त्याच्या नातेवाईकांना मोठाच दिलासा मिळाला. याचे कारण असे की एखाद्याला एचआयव्हीचा संसर्ग झाल्याचे कळले की आसपासच्या स्त्री-पुरुषांची 'त्या' व्यक्तीकडे पाहण्याची नजरही बदलून जाते. त्यामुळे आता आपल्याला कोणी तारणहार नाही, अशी भावना संबंधित व्यक्तीच्या मनात निर्माण होऊन ती मनाने अधिकच खचून जाते. एचआयव्हीमुळे त्या व्यक्तीचे शरीर दुबळे होऊ लागलेले असतेच; त्यातच मनसुद्धा कमकुवत झाल्यावर तर त्या व्यक्तीची अवस्था अधिकच कठीण होते.

रोगाशी सामना करण्याची उमेदच हरवून जाण्याचा धोका निर्माण होतो. परंतु सरकारने एआरटी औषधे विनामूल्य उपलब्ध करून दिल्याने आपल्याला कोणाचा तरी आधार आहे, ही भावनाच त्या व्यक्तीच्या मनाला उभारी देणारी ठरते. साहजिकच रोगाशी मुकाबला करण्यासाठी आवश्यक असणारा मानसिक धीर तिला मिळतो. या साऱ्या पार्श्वभूमीवर एखाद्या सरकारी हॉस्पिटलामध्ये एड्सच्या रुग्णाला द्यावयाच्या औषधांसाठी तेथील डॉक्टरांनीच पैसे मागावेत ही गोष्ट निश्चितच लांच्छनास्पद आहे. याबाबतीत संबंधितांची चौकशी आणि त्यानंतर योग्य ती कारवाई व्हायला हवी. एड्सशी सुरू असलेल्या लढाईतील यशासाठी ते आवश्यक आहे.

Disclaimer: The news story on this page is the copyright of the cited publication. This has been reproduced here for visitors to review, comment on and discuss. This is in keeping with the principle of ‘Fair dealing’ or ‘Fair use’. Visitors may click on the publication name, in the news story, to visit the original article as it appears on the publication’s website.

वार्तापत्र

 
वार्तापत्र

प्रकाशने

 
एकच निर्धार

Link to Aarogya